PESTA BONA TAON PUNGUAN POMPARAN NI DATU PANGGANAGANA ANAK NI NAMORAHIAN BORU DOHOT BERE SE-JABODETABEK
Di GEDUNG DEPSOS BEKASI TIMUR
Jakarta, 31 Januari 2010
Di GEDUNG DEPSOS BEKASI TIMUR
Jakarta, 31 Januari 2010
KATA SAMBUTAN SIAN PENASEHAT
Drs A L Tobing
Drs A L Tobing
Puji-pujian ma tapasahat tu Amanta Pardenggan Basa i, ala didongani do hita boi hipas-hipas pajumpang di Bona ni Taon on. Marpungu do hita nuaeng Pomparan ni Op Datu Panggana-gana na sian Simanampang, laho manghamauliatehon angka pasu-pasu naung tajalo sian Tuhanta, i ma pasu-pasu hahipason, parngoluon , parianakkonon, dohot lan na asing.
Mauliate ma pinasahat tu Panitia naung loja laho mempersiaphon Pestanta sadari on, jala mauliate ma pinasahat tu sude ruas ni Punguanta dohot tu sude pomparan ni Ompunta, tarlumobi ma tu hamu Amanami/Inanami undangan nami.
Songon penasehat iba, di utus Panitia laho mandok hata, laos dipangido nasida asa patorangon taringot tu Tarombonta.
Paboahon Tarombo dimulana i Tona do. Na dihatahon natoras tu pomparanna. Dung pe ro hamajuon asa boi disurathon. Dang sai sude cerita ni ompunta na boi sahat tu hita nuaeng. Alai khusus taringot Ompunta Datu Panggana-gana adong do tona ni angka ompunta na di Simanampang. Ia tona i songon on ma:
Ia Ompunta datu Pangganagana Lumbantobing magodang ditabu-tabu do, tubu ni ina Boru Siahaan sian Lobu Siregar, ina panoroni pardihuta (tungganeboru) ni Namorahian Lumbantobing. Na dangol do ompunta on. Laho do tu Barumun ala datu bolon ibana, jala laos mambuat boru do disi. Mangihuthon tona ni angka ompunta na di Simanampang, siluluan do pinomparna na di Barumun i, jala molo mangalului ingkon boanon do piso ni Datu Pangganagana, na binoan ni pinomparna na tu Simanampang, ai tinggal do sarungna di Barumun, dang boi holan laho boti, jala molo umbuk do piso i tu sarungna, nasida na mameop sarungna i ma toho haha anginta.
Dung monding pardihuta ni Namorahian na parjolo, i ma boru Simare na manubuhon
Raja Ijae, Bonandolok dohot Parumarea, mambuat boru ma muse Namorahian ima boru Siahaan sian Lobu Siregar songon panoroni, alai tingki ditabu-tabu (dibortian) dope Datu Pangganagana monding ma Namorahian. Na dangol do ninna Ompunta Datu Pangganagana on. Laho do Datu Pangganagana tu Barumun (Tapanuli Selatan) laho mandatui, jala gabe mambuat boru disi jala adong do pinomparna disi.
Di Tarombo ni Lumbantobing na di Simanampang, ia pinompar ni na di Barumun i laos dibahen do Op Barumun, ai so jumpangsa dope pinompar ni Op Barumun i.
Asa tolu ma pinompar ni Datu Pangganagana, i ma:
Arga do tona ni angka Ompunta i. Ai ndang tonahononna tu hita na so tingkos.
Jadi molo tarombo na adong di Simanampang: Opat do anak ni Namorahian ima :
1. Op Raja Ijae,
2. Op Bonandolok ,
3. Op Parumarea, i ma tubu ni ina parjolo.
4. Op Datu Pangganagana, i ma tubu ni ina Boru Siahaan sian Lobu Siregar.
Tolu ma anak ni Datu Panggana-gana ima :
1. Op Nangon , ima na umpompar par Simanampang.
2. Op Lampas, ima naumpompar na tinggal di Parbubu.
3. Op Barumun ima na tinggal di Barumun.
Dua ma anak ni Op Nangon i ma :
1. Op Humorna (Par Hutabagasan, Sosor Gareja dohot Sosor Tambinsu)
2. Op Pangajian (Par Hutajulu)
Jonok ninna partubu alai jonokan do parhundul. Songon i do pinompar ni Op Lampas di Parbubu. Ai molo adong pe ulaon di nasida najolo dang apala dijou be hita tu Simanampang, jala molo adong pe ulaon di par Simanampang dang apala dijou be dongan tubu na di Parbubu. Ala parhundul nasida donok tu Op Raja Ijae, gabe domu do nasida, jala gabe pinompar ni Op Raja Ijae do dibahen nasida Op Datu Panggana-gana. Alai ianggo par Simanampang, hot do ia Datu Pangganagana anak ni Namorahian.
Dang adong mardua tarombo di Simanampang, molo tung adong pe na gabe asing diboanhon di pangarantoan do. Lapatanna, ala ni angka pangarantona do umbahen na adong pinompar ni par Simanampang mangihuthon na masuk pomparan ni Op Raja Ijae.
Boasa adong pangaranto ni par Simanampang manimbil sian tona ni ompuna?
Beha do partupa ni i?
Pinatorang ma tu hita saonari dohot na satingkosna olat ni nabinoto dohot na niantusan.
Di taon 1950-an dang piga dope pomparan ni Datu Pangganagana di Jakarta on. Ro ma Amanguda Jansen L Tobing tubu ni Ompungniba sipaidua , mangaranto tu Jakarta on sian Tano Jawa, ala nunga mangaranto tu tano Jawa Ompung i. Sanga do Amanguda Jansen on marsorangan di bagas ni Ibotonami mangulahi (namboruna) na muli tu marga Gultom sian Batunadua Pangaribuan.
Mansai bajar dope uda Jansen on mangaranto, sekitar 14 taon. Dung lam magodang jala dung hot ripe ibana , sada halak na berwibawa do Uda Jansen on. Jala terakhir jabatanna i ma : Kepala Personalia Departemen Pertanian, andorang so pisah dohot Kehutanan. Sahat iba tu Jakarta on taon 1972, pajumpang ma iba dohot uda on, jala ibana nunga Ketua ni Punguan Pomparan ni Op Raja Ijae di Jakarta on. Sipatujoloon do Uda Jansen on, nang pe diparadatan nang pe di sinadongan.
Parsahat ni Abang Pungka Lumbantobing na tumodohon iba tu Jakarta on, laho mandapothon uda Jansen on do. Jadi parjolo do abang Pungka L Tobing umbotosa sian iba, naung pilit tarombo na binoanhon ni Uda Jansen. Sahat tu taon 1979 nunga sekitar 4 periode uda Jansen gabe Ketua ni Op Raja Ijae di Jakarta on.
Hea do iba mangkatai dohot Uda Jansen taringot tu tarombo on, jala pandokna adong do ninna ibana Pomparan ni Op Raja Ijae di Simanampang, di luar pinompar ni Op Nangon. Hape sasintongna dang adong. Sian i ma binoto ianggo partaromboon sedetail-detailna na di Simanampang dang diboto ibana.
Hea do ninna Abang Pungka mangkatai nasida taringot tu tarombo on, paboa na anggi ni Op Raja Ijae do Datu Pangganagana, alai didok uda Jansen: ”beha do bahenon ai nunga sanga Ketua iba”, ninna.
Naeng ma bukaonnami persoalan Tarombonta on ditingki Ketua dope Uda Jansen, alai ro Uda Adarusman par- Cimahi tubu ni Ompung nomor tolu na mandok tu hami, “unang pola apala di masa haketuaonna on buka hamu, asi roha, ai dung persiun udami ekonomina pe cepat anjlok , jolo periodema” ninna.
Gabe hutunda hami ma dohot abang Pungka mambuka persoalan i . Hape, sian na so huduga hami, periode berikutna ketua ni Op Raja Ijae dipasahat ma tu si Bernat L Tobing anak ni apala Amanguda Guru Justin L Tobing.
Beha do parmasuk ni angginiba si Bernat tu punguan ni Op Raja Ijae? Ai tingki di Hutabaginda Uda guru Justin natorasna maringanan, dang adong persoalan taringot tu tarombo on.
Sialana songon on do (cerita ni Abang Pungka L Tobing): Ia naeng mangoli si Bernat di Jakarta on , sanga do naeng pasahaton ni Uda Guru Justin tu pomparan ni Op Somuntul , alai muruk ma Uda Jansen, “molo i do pillitonmu , ula ma ulam” ninna , ala ibana nunga Ketua ni Op Raja Ijae. Jala pomparan ni ompung na solhot di Jakarta on hatiha i, i ma Uda Jansen do.
Ala gabe dipasahat do tu Uda Jansen laho mangamai, tontu masuk tu Op Raja Ijae do antong, ala sedang ketua ibana disi. Dung pangolion ni si Bernat do gabe mangihuthon Op Raja Ijae Uda Guru Justin /br Simorangkir (Janda Kaya ).
Di parmonding ni Uda Guru Justin natoras ni Ir Bernat L Tobing, ro do angka natua-tua sian Simanampang. Alai didok inanguda boru Simarangkir (Janda Kaya) do ia nasida masuk tu Op Raja Ijae.
Siala ni hata i, mulak ma sude par Simanampang tu huta, didok nasida: “molo songon i do, dang jagal nami i “ (lapatanna dang ulaon nami i. )
Gabe tallong ma rencana penguburan , ai Ompu na asing dang adong na barani manjama, ai tangkas do diboto angka natua-tua di Tarutung, ia guru Justin L Tobing apala amanguda ni Guru Pingkir L Tobing ( apala angkang niba, i ma na dohot mambahen pernyataan ni par Simanampang di Buku Tarombo na disusun ni si Adniel L Tobing)
Ujungna dijou ma muse par Simanampang dohot janji na so dohonon ni hasuhuton Pomparan ni Ompu Raja Ijae nasida. Tuat ma par Simanampang muse, jala ujung ni pangkataion i, mardalan ma parjambaran songon na niihuthon ni par Simanampang. Ai aut sura dang songon i, tinggalhonon ni par Simanampang do muse. Alai diadopi par Simanampang do ulaon i.
Secara kebetulan, baik si Halomoan, si Bernat maupun si Viktor apala anak ni Uda Gr Justin, dang adong na boi ro di parmonding ni Amanguda Guru Justin.
Jadi Amang nami St Gerhard , Uda St Marinus , dohot Abang Guru Pingkir do na gabe hasuhuton disi. Cerita nama na sahat tu angka anak ni Uda Guru Justin i, pardalan ni angka parjambaran sian Inanguda i.
Jala iba sandiri topet do marsingkola di PGSLP Tarutung tingki i, jala mananginagi do ahu di pintu ni jabu parrapoton i. Jala Amang Miduk L Tobing pe ninna disi do, lapatanna diihuthon Amang Miduk do parrapoton/pangkataion i. (Dang masitandaan dope iba di tingki i).
Jala siala i ma umbahen na mansai mendukung Amang Miduk di na tapajongjong Punguan ni Pomparan ni Datu Pangganagana anak ni Namorahian di Jakarta on, ai ro do amang Miduk di peresmian ni Punguan i, i ma Ari Minggu, tgl 29 Augustus 1982.
Di na masipatorangan Damang St Gerhard dohot dongan tubu na sian Op Lampas di parrapotan i, adong ma sian pomparan ni Op Lampas mandok tu Amang songon on: “mangihuthon pandok ni dongan tubunta di Jakarta si Jansen do goarna, ia Datu Pangganagana anak ni Op Raja Ijae do“ ninna, jala dialusi amang ma: “ai ise huroha si Jansen i, anggingku do i apala anak ni Amanguda , dang umbotoan i sian ahu, na so diantusi do i “ ninna Amang mangalusi . “Jadi molo songon i, sada do hita hape” ninna ma tu Amang, laos masijalangan ma nasida, i ma cerita ni Amanta hami tu ahu sandiri.
Asa jelas ma botoonta, ia dongan tubu pinompar ni Op Lampas, nunga tung leleng dang berkomunikasi be dohot par Simanampang di Silindung. Jala menurut pendapathu, mulai sian tahun 1887 tingki Wakil Kepala Negeri Op. Jarunjung, dang apala masijouan be diparadatan, lapatanna molo adong Adat, nunga cukup na di Simanampang mangulahonsa, molo tung ro pe sian Silindung , undangan na ma. Ai banje do ulaon adat di Simanampang, ala dua ompu disi i ma: Op Humorna dohot Op Pangajian. Molo di Op Humorna ulaon, ba Op Pangajian ma panamboli. Jala molo Op Pangajian marulaon, Op Humorna ma Panamboli. Molo asing sian i sada tingki na parpudi , ala ni pengaruh “devide et impera “ ni fihak na asing do.
Di parmonding ni Uda Jansen di Jakarta on, dipangkataion mulak sian udean, mullop ma hata sian Lae (mangulahi) Marpaung pensiunan Letkol mandok: Ai beha do huroha tarombonta, ai mulak ahu tu Medan Lae Darianus L Tobing par Binjai selaku Ketua ni Punguan Pomparan ni Datu Pangganagana di Medan, mandok “ Datu Pangganagana anggi ni Op Raja Ijae do, dang anakna”, ninna. Gabe songon na timbul do ketegangan tingki antara pinompar ni Op Lampas dohot iba, alai ala na baru berduka do saat i, gabe masiorom emosina be do, jala semufakat ma asa mangkatai taringot tu tarombo i di sada tingki. Jala laos dibuhul ma ari, di taon baru na ro hira 3 bulan nari , di bagas ni Bernat L Tobing. Jala namangkatai taringot tu tarombo i, holan pomparan ni Datu Pangganagana sambing do, dang dohot sian Op Raja Ijae.
Saut do pangkataion i di bagas ni si Bernat, alai ala adong angka na so konsisten tu rencana semula dipangkataion, gabe adong do ketegangan di tingki i. Alana, ia dung sidung ma marsipanganon, pintor didok natua-tua sian pomparan ni Op Lampas ma: “Jadi dang pola leleng-leleng, taolophon ma na pomparan ni Op Raja Ijae hita ate!” ninna. Pintor jongjong ma iba dohot abang Pungka, hudok ma: “Mangihuthon komitmen semula, na laho mangkatai taringot tu tarombonta do ala adong perbedaan, dang laho mangolophon. I pe, molo naeng torushononta mangkatai, jolo ditarik ma hatana” ningku, ai angka na torop pe nunga marungut-ungut di pangkataion ni natua-tua i. “Antong, hutarik ma hatangki, anggap ma i na so adong”, ninna ma, gabe boi ma dimulai mangkatai. Mansai godang do argumen disi, jala dang konsisten nasida, ai ternyata pomparan ni Op Raja Ijae i ma si Professor do pembicara nasida maralohon Abang Pungka dihot Iba sandiri.
Didok si Professor : “Ai Op Raja Ijae do na pajaehon Datu Pangganagana, i do patuduhon anak ni Op aja Ijae datu Pangganagana” , ninna. Hualusi ma, dang holan Op Raja Ijae mangalehon tano tu Datu Pangganagana, Op Parumarea pe adong do dilehon di Siualu Ompu, nunga hea huida i, ningku. (Ai hea didok abang guru Pingkir, jala dipatuduhon tu iba,dang apala tanggap iba disi, ai binoto dang pomparan ni Op Paruma rea Datu Pangganagana. Ai aut sura marroha-roha iba rupani, da boi ma gabe ahuton niba tano i? Alai dang tusi laona) Nuaeng pe, molo toho do hita naeng manaringoti kebenaranna, ingkon terbuka do hita menerima kesemufakatan, molo tung adong annon na marasing sian na binoanhonna, ingkon disediahon ma dirina” ningku.
Pintor ro ma pinompar ni Op Lampas i ma par Tomang ( na marboru Simorangkir, lupa iba goarna), mandok: “Manang na beha pe, sahat tu na mate, ianggo hami pinompar ni Op Raja Ijae do!” ninna. Ba molo songon i do dohononmu, ai so kumoras hamu sian natua-tua nami na di Simanampang “ ningku. (Jala huingot na nidok ni angka natuatuanta, jonok partubu alai jumonohan do parhundul, tar songon i do dongan tubunta pomparan ni Op Lampas na tading di Parbubu, ninna natua-tua di Simanampang)
Ujung ni pangkataion, diputushon ma asa borhat utusan tu Tarutung, laho managkasi. Sian pihak ni na mangihuthon par Simanampang dohot sian pihak ni na mangihuthon Op Raja Ijae alai pomparan ni Datu Pangganagana.
Borhat ma si Bernat Cs secara sepihak tu Tarutung , dang dipaboa tu hami. Dibahen ma parpunguan di Bagas ni si Bernat di Tarutung , jala dipillit nasida ma sian Simanampang na so apala mangantusi tarombo, asa mura pengaruhanna, laho manaringoti tarombo i.
Dang utusan ni natua-tua di Simanampang na dohot i. Jala binoto ma, na marsangajo do si Bernat dang paboahon tu hami asa borhat tu Tarutung. Dang jujur ibana tu hami. Di videohon ma pertemuan i, di edit ma video i, jala di issuhon ma naung setuju par Simanampang, ai nunga adong utusan ni par Simanampang. Hape angka na so mangantusi tarombo do dipillit nasida.
Hape, sian semula ingkon dohot do hami sian Jakarta, ima si Pungka L Tobing manang Almudin L Tobing , dohot Amangtua Maringan L.Tobing manang abangna Mangala L Tobing, rap dohot nasida laho manaringoti tarombo i tu bona pasogit. Ianggo semula hata asa patiurhon do, hape sesungguhna niat ni si Bernat Cs, asa mangihuthon na di rohana i do, apala i ma mambahen so tajalo rohaniba.
Ala dang toho na ro tu pertemuan i utusan ni par Simanampang, alai pribadi do, jala dang parbinoto natua-tua na di Simanampang taringot tusi, jadi gabe mengambil sikap ma Natua-tua na di Simanampang, ima : Unang lam mampar angka pinomparta i, tubu ma di roha nasida laho pajongjong tugu di Simanampang.
Tingki arisan di jabu ni si Mangasi L Tobing di Cijantung, tarboto ma ia Bernat Cs nunga “kampanye” di Jakarta on, dohot cara mamutar video naung di edit, pertemuan na di jabu nasida i di Tarutung, jala di issuhon ma, ia par Simanampang nunga satolop.
Ala kecurangan do pertemuan nasida i nietong, ro ma usul di tingki arisan na di bagas ni si Mangasi, di utus ma iba laho manangkasi natua-tuanta di Simanampang.
Borhat ma iba tu Simanampang, memang kebetulan naeng marpesta pamuli boru hami, gabe sada ni danggur dua na hona ma parlaoniba. Dibuat do sipanganon ni natua-tuanta di Simanampang, biayana i ma sian Punguan arisan Datu Pangganagana na di Jakarta jala dang pribadi iba na mambuat sipanganon i, laho mangkatai tarombo i, jala marpungu do sude angka natua-tua na tolap mardalan termasuk ma Kampung Gerson na marumur 87 taon tingki i (Pahompu ni Raja Wakil Op Jarunjung).
Di pangkataion i, dibahen ma tona nasida tu angka pinomparna, jala disuru ma iba manurat tarombo i, binahen ma i di atas kertas segel jala ditanda tangani angka natua-tua na di Simanampang ma. Dohot do natua-tua na so tolap ro tu parpunguan i martanda tangan disi. Jala hupaboa do diparrapotan i: “ia ngiet nami par Jakarta, asa ro hamu natua-tua nami songon utusan laho mangaresmihon punguan nami ima Punguan Pomparan ni Datu Pangganagana anak ni Namorahian di Jakarta”. Satolop ma nasida mangutus Ompung Demin L Tobing (Op Marni ) dohot Uda Aston L Tobing (ama Tambor).
Ro ma Ompung Demin L Tobing (Op Marni ) dohot Uda Aston L Tobing (ama Tambor) mangaresmihon punguan ni Datu Panggana-gana anak ni Namorahian di Jakarta, i ma tanggal 29 Augustus 1982 di Gedung Sekolahan GKPI Rawamangun, jala dohot do Raja Miduk L Tobing pomparan ni Op Somuntul tingki peresmian i.
Dapot ma di tingkina, saut ma dipajongjong par Simanampang tugu i, jala disurathon Tugu ni Datu Pangganagana anak ni Namorahian.
Gabe sibor ma si Bernat Cs, jala diperkarohon ma mar pengadilan. Dibahen ma Penggugat Bernat Cs, i ma kelompok na mangihuthon Op Raja Ijae, jala tergugat Nurdin Cs ima na mangihuthon Datu Pangganagana anak ni Namorahian manang par Simanampang.
Ia kelompok Bernat Cs di dampingi Pengacara do, alai kelompok ni Nurdin Cs dang didampingi Pengacara. Sudah tentu terjadi ketimpangan, ai holan keyakinan kebenaran do modal ni par Simanampang mangihuthon tona na jinalona, hape di zaman Orde Baru aha ma na so boi bahenon ni parhepeng? Dang pola maol antusanta i. Jadi, talu ma di Pengadilan Negeri par Simanampang, alai naik banding ma par Simanampang , jala mangido bantuan LBH ma hami tu UI di Jakarta, jala koordinasi dohot LBH ni USU di Medan, laho mangurupi par Simanampang , jala hasilna monang ma par Simanampang i ma Nurdin Cs, di Pengadilan Tinggi Medan.
Naik banding ma muse Bernat CS kasasi, jala di Jakarta nama proses ni i, jala monang ma Bernat Cs. Dung talu par Simanampang di Kasasi, hu upayahon hami ma muse Peninjauan Kembali, baru terbit dope undang-undang i, ala adong bukti otentik dapot hami i ma buku ni si Vergouyen tentang hukum Adat Batak dalam bahasa Inggeris, ai adong disi pas songon tarombo ni na di Simanampang i, na terbit tahun 1930 an. Tarsurat do disi na opat anak ni Namorahian i ma: Op Raja Ijae, Op Bonandolok, Op Parumarea dodot Datu Pangganagana (Simanampang). Sangat teliti do buku on, ai dang dapot disi na salah cetak nangpe manurathon hata Batak. Molo dibandingkon dohot cetakan di Indonesia ima terjemahan ni buku i Dr. Br Simatupang tu bahasa Indonesia , na godang sala cetak , isara ni Datu Pangganagana (Simanampang) di Buku Asli, gabe tarsurat Datu Pangganagana (Simaungmaung) di terjemahan.
Na nidok, ia ketelitian ni halak Bolanda laho mambuat gelar Doktor songon Vergouyen on, nunga marasing dohot Doktor ni Indonesia. Lapatanna, molo sedang persoalan do tingki i tarombo on, dang mungkin bahenon ni Calon Doktor ni Bolanda gabe contoh patorangkaon pardalan ni Adat Batak. Ai Tarombonta i ma di pangke si Vergouyen patorangkon sipatorangonna taringot tu parjambaran tingki Horja.
Mansai mura do alus ni Peninjauan Kembali i, di jaman Orde Baru, jala dang pola maol antusan i. Ai didok alasanna, pendapat pribadi ni si Vergouyen do ninna tarombo i. Beha ma mungkin pendapat ni si Vergouyen i, hape disurat do disi dijalo sian pomparan ni Op Tuan Nahoda( Par Sait ni Huta do i).
Iba sandiri yakin, aut sura di Jaman Belanda perkara on, paulahonna do i tu Raja Adat, ala dang wilayah ni Hukum Negara mengatasi persoalan i, alai wilayah Hukum Adat do, jadi ingkon paulahonna do persoalan i tu Raja Adat.
Godang do jebakan bahenon ni naung manimbil i, laho mambahen asa unang porsea tu Tona ni Ompunta i. Isarana na ro tu Iba songon on, didok Uda Jansen ma tu iba songon tudosan, songon on:
“Molo mapeut halto tu sada porlak, tubu ma gabe bagot, bagot ni ise do i?” ninna. Ala dolidoli dope ahu di tingki i, nian ianggo tarombo on dang tumangkas di ibana sian di ahu nang pe naung matua (Ketua) ibana. Dang apala huboto dope mangalusi secara pollung (diplomat), alai hualusi ma:” Dang toho umpama (tudosan) mi Amanguda bahenon tu ompunta”, ningku mangalusi. Gabe hohom ma ibana. Alai aut sura saonari taralusan do mandok, ia ompunta na mengandung Dt Pangganagana denggan do di alap sian Lobu Siregar. Jadi ndang songon halto na disirithon ni bontarpudi ompunta i. Ai ianggo madabu sian bonana do tu toru laos tubu di porlak i dang sisungkunon i. Alai ala na disirithon musang manang bontarpudi do umbahen sahat tu porlak i, dang binoto bonana sian dia, i do na sisungkunon. Hape Ompunta Datu Pangganagana jelas do bonana i ma Boru Siahaan sian Lobu Siregar na nialap (pardihuta) ni Namorahian. Dang adong sisungkunon disi. Ai dang adong sian kedua belah pihak ni na marparkarohonsa, so marhatutuhon ia Datu Pangganagana magodang di tabu-tabu do. (Tidak ada yang menyangkal bahwa Datu Pangganagana “magodang di tabu-tabu”)
Tinaringotan ma jolo muse dung ketua ni Op Raja Ijae si Bernat L Tobing di Jakarta, laos di lanjuthon do muse tu si Viktor L Tobing apala anggina . Jadi mulai periode ni Uda Jansen, diuduti periode ni si Bernat, diuduti muse periode ni si Viktor, jadi sian hita pomparan ni par Simanampang, na gabe Ketua ni Op Raja Ijae di Jakarta on, hurang lobi 36 taon. Molo Uda jansen mansai malo (berwibawa) di paradaton manang Raja Adat do, alai si Bernat andul dao ditoruna do i, songon i do nang si Victor. Boasa pola ingkon si Bernat dohot si Viktor gabe ketua ni Ompu Raja Ijae di Jakarta ?
Beha ma tutu bahenon ni naung manimbil i mulak tu hita? Sapala na maridi ba tonu ma ninna rohana ma. Gabe di devide et impera ma hita. Jala disundati ma Horja mamestahon tugu ni Datu Pangganagana anak ni Namorahian na di Simanampang i.
Ai dihallung Polisi dohot Tentara do tataganing, ogung dohot alat na asing, jala angka Natua-tua par Simanampang disarat-sarat ma tu Tarutung, dang dipardulihon angka tangis ni Natua-tua, ina-ina dohot dakdanak, jala na humansit di issuhon ma na PKI natua-tuanta i, asa adong alasan ni Polisi dohot Tentara terjun.
Polisi dohot Tentara manundati (menggagalkan) Horja naung tare parasoman, laho mampartahanhon Tona na jinalona sian angka Ompungna, jala na ni haporseaanna, di daerah pelosok huta Simanampang, salangkon di jaman penjajahan Bolanda pe, dang dung masa na songon on binoto. Hape dung mardeka hita di Republik Indonesia on, boi masa na songon i? Dang tarjalo roha i.
Pola do ro dongan tubu sian Silindung khususna Pomparan ni Bonandolok i ma sian Op Sumurung dohot sian Ompu Somuntul laho pasahat si pir ni tondi tu par Simanampang, pa pir tondi ni pomparan ni Datu Pangganagana anak ni Namorahian.
Dang kuat angka natua-tua bertindak (songon na kalah perang) mampartahanhon tugu na pinajongjongna i, ala bingung jala frustrasi nasida. Jala dibongkar ma tugu na pinajongjong ni natua-tuanta i. Sitarapan do ditogihon sian [enjara Tarutung laho mangarupakkon Tugu i, ai dang barani (dang pulut roha ni) Polisi, dung jolo disuntik dohot zat kimia.
Ia pajongjong tugu i, na gotong royong do angka natua-tua, naposo, dohot dakdanak, di hunti do rihit sian rura, dihali jala dihunnti do batu sian dolok Sitarindak, jala dihunti do simin sian Tarutung, dikocok nasida rihit dohot simin, jala tangan nasida pajongjongkon tugu i. Beha , boi do tabayangkon arga ni tugu i di nasida? Dang rupiah argana, alai moral, identitas, roha, tenaga, hodokna, dna. Beha do antong pangantusionta disi?
Jala sahat tu saonari effekna sangat negatif do tu pendididkan ni dakdanak, mentalitas ni angka natua-tua, ala bernit jala dangol situtu dihilala, dang boi mampartahanhon tona ni ompuna.
“Dipajongjong nasida tugu ni Datu Pangganagana anak ni Namorahian, da holan laho mampartahanhon tona ni ompuna do”.
Godang do na ro saonari di pesta on na menyaksikan cara ni aparat menggagalhon horja i. Frustrasi do angka natua-tua, naposo dohot dakdanak. Sian segi pendidikan tu dakdanak, godang do na sala tindakan ni dakdanak diloas natua-tua, misal na : Diloas do dakdanak mandangguri bagas ni Uda St Marinus (ala mangurupi Bernat Cs & polisi patudu dalan laho manggagalhon pesta i) jala dipandok dakdanak i: “Eh , Marinus, holan ala ni ho ma gabe sundat horja nami, huhut di dangguri jabuna”. Dipasombu angka natua-tua do angka dakdanak i. Disi ma antusanta, da naung frustrasi do natua-tua nang dakdanak?
Jala pengaruh na sahat do tu nuaeng on, mansai mura do nasida marsalisi, domu ma ala sai adong na mamola-mola manang mambahen de vide et impera. Sipata mura kompak, sipata mura marsalisi, tarida do i sian na masa tindakan nasida laho manegai jabu ni na diduga nasida parbegu ganjang (par Jae-jae didok nasida). Gabe di hurung polisi nasida di penjara Tarutung. Habisuhon ni angka ompunta najolo dang tarihuthon nasida nuaeng.
Dang na pasalahon nasida iba, alai sude i napatardashon tu hita do, ima: ia masa pe angka i naparpudi on, ala ni pengaruh ni proses devide et impera ni na memihak tu Op Raja Ijae do. Asi do roha di angka natua-tua i, ala dang gabe bantuan mamang pembinaan na ro sian pangarantona, alai angka bola-bola dohot ela-ela do asa unang tarihuthonsa tona ni ompuna.
Ia angka pangaranto ni halak, laho membangun hutana do, hape pangarantonta ??
Aha do naboi bahenonta?
Nunga hupasahat tu hita Tona ni angka ompunta na di Simanampang, ala sangat dipercayahon nasida tu iba laho patolhashon Tona i tu hita pinompar ni Op Datu Pangganagana anak ni Namorahian. Mauliate ma di hamuna ala olo hamu tumangihon, jala tung mansai lumbang do huhilala nuaeng ala adong kesempatan na balga songon on, i ma Pesta Bona Taon on, laho patolhashon i tu hita saluhutna. Horas ma!
Mauliate ma pinasahat tu Panitia naung loja laho mempersiaphon Pestanta sadari on, jala mauliate ma pinasahat tu sude ruas ni Punguanta dohot tu sude pomparan ni Ompunta, tarlumobi ma tu hamu Amanami/Inanami undangan nami.
Songon penasehat iba, di utus Panitia laho mandok hata, laos dipangido nasida asa patorangon taringot tu Tarombonta.
Paboahon Tarombo dimulana i Tona do. Na dihatahon natoras tu pomparanna. Dung pe ro hamajuon asa boi disurathon. Dang sai sude cerita ni ompunta na boi sahat tu hita nuaeng. Alai khusus taringot Ompunta Datu Panggana-gana adong do tona ni angka ompunta na di Simanampang. Ia tona i songon on ma:
Ia Ompunta datu Pangganagana Lumbantobing magodang ditabu-tabu do, tubu ni ina Boru Siahaan sian Lobu Siregar, ina panoroni pardihuta (tungganeboru) ni Namorahian Lumbantobing. Na dangol do ompunta on. Laho do tu Barumun ala datu bolon ibana, jala laos mambuat boru do disi. Mangihuthon tona ni angka ompunta na di Simanampang, siluluan do pinomparna na di Barumun i, jala molo mangalului ingkon boanon do piso ni Datu Pangganagana, na binoan ni pinomparna na tu Simanampang, ai tinggal do sarungna di Barumun, dang boi holan laho boti, jala molo umbuk do piso i tu sarungna, nasida na mameop sarungna i ma toho haha anginta.
Dung monding pardihuta ni Namorahian na parjolo, i ma boru Simare na manubuhon
Raja Ijae, Bonandolok dohot Parumarea, mambuat boru ma muse Namorahian ima boru Siahaan sian Lobu Siregar songon panoroni, alai tingki ditabu-tabu (dibortian) dope Datu Pangganagana monding ma Namorahian. Na dangol do ninna Ompunta Datu Pangganagana on. Laho do Datu Pangganagana tu Barumun (Tapanuli Selatan) laho mandatui, jala gabe mambuat boru disi jala adong do pinomparna disi.
Di Tarombo ni Lumbantobing na di Simanampang, ia pinompar ni na di Barumun i laos dibahen do Op Barumun, ai so jumpangsa dope pinompar ni Op Barumun i.
Asa tolu ma pinompar ni Datu Pangganagana, i ma:
Ompu Nangon pomparanna na di Simanampang,
Op Lampas pomparanna tinggal di Parbubu Pea ,
Ompu Barumun pomparanna na tinggal di Barumun.
Adong do piso ni Datu Pangganagana dipeop par Simanampang , jala sarungna dipeop na tinggal di Barumun. Jala molo mangalului pomparan ni Datu Pangganagana na di Barumun i, ingkon boanon do piso i , jala paumbuhon tu sarungna. Molo umbuk do, ba namameop (nampuna) sarungna i ma na toho dongan tubunta. Molo so umbuk do nang pe mangoku nasida, dang tarjalo hita i, i ma tona ni angka ompunta na di Simanampang. Op Lampas pomparanna tinggal di Parbubu Pea ,
Ompu Barumun pomparanna na tinggal di Barumun.
Arga do tona ni angka Ompunta i. Ai ndang tonahononna tu hita na so tingkos.
Jadi molo tarombo na adong di Simanampang: Opat do anak ni Namorahian ima :
1. Op Raja Ijae,
2. Op Bonandolok ,
3. Op Parumarea, i ma tubu ni ina parjolo.
4. Op Datu Pangganagana, i ma tubu ni ina Boru Siahaan sian Lobu Siregar.
Tolu ma anak ni Datu Panggana-gana ima :
1. Op Nangon , ima na umpompar par Simanampang.
2. Op Lampas, ima naumpompar na tinggal di Parbubu.
3. Op Barumun ima na tinggal di Barumun.
Dua ma anak ni Op Nangon i ma :
1. Op Humorna (Par Hutabagasan, Sosor Gareja dohot Sosor Tambinsu)
2. Op Pangajian (Par Hutajulu)
Jonok ninna partubu alai jonokan do parhundul. Songon i do pinompar ni Op Lampas di Parbubu. Ai molo adong pe ulaon di nasida najolo dang apala dijou be hita tu Simanampang, jala molo adong pe ulaon di par Simanampang dang apala dijou be dongan tubu na di Parbubu. Ala parhundul nasida donok tu Op Raja Ijae, gabe domu do nasida, jala gabe pinompar ni Op Raja Ijae do dibahen nasida Op Datu Panggana-gana. Alai ianggo par Simanampang, hot do ia Datu Pangganagana anak ni Namorahian.
Dang adong mardua tarombo di Simanampang, molo tung adong pe na gabe asing diboanhon di pangarantoan do. Lapatanna, ala ni angka pangarantona do umbahen na adong pinompar ni par Simanampang mangihuthon na masuk pomparan ni Op Raja Ijae.
Boasa adong pangaranto ni par Simanampang manimbil sian tona ni ompuna?
Beha do partupa ni i?
Pinatorang ma tu hita saonari dohot na satingkosna olat ni nabinoto dohot na niantusan.
Di taon 1950-an dang piga dope pomparan ni Datu Pangganagana di Jakarta on. Ro ma Amanguda Jansen L Tobing tubu ni Ompungniba sipaidua , mangaranto tu Jakarta on sian Tano Jawa, ala nunga mangaranto tu tano Jawa Ompung i. Sanga do Amanguda Jansen on marsorangan di bagas ni Ibotonami mangulahi (namboruna) na muli tu marga Gultom sian Batunadua Pangaribuan.
Mansai bajar dope uda Jansen on mangaranto, sekitar 14 taon. Dung lam magodang jala dung hot ripe ibana , sada halak na berwibawa do Uda Jansen on. Jala terakhir jabatanna i ma : Kepala Personalia Departemen Pertanian, andorang so pisah dohot Kehutanan. Sahat iba tu Jakarta on taon 1972, pajumpang ma iba dohot uda on, jala ibana nunga Ketua ni Punguan Pomparan ni Op Raja Ijae di Jakarta on. Sipatujoloon do Uda Jansen on, nang pe diparadatan nang pe di sinadongan.
Parsahat ni Abang Pungka Lumbantobing na tumodohon iba tu Jakarta on, laho mandapothon uda Jansen on do. Jadi parjolo do abang Pungka L Tobing umbotosa sian iba, naung pilit tarombo na binoanhon ni Uda Jansen. Sahat tu taon 1979 nunga sekitar 4 periode uda Jansen gabe Ketua ni Op Raja Ijae di Jakarta on.
Hea do iba mangkatai dohot Uda Jansen taringot tu tarombo on, jala pandokna adong do ninna ibana Pomparan ni Op Raja Ijae di Simanampang, di luar pinompar ni Op Nangon. Hape sasintongna dang adong. Sian i ma binoto ianggo partaromboon sedetail-detailna na di Simanampang dang diboto ibana.
Hea do ninna Abang Pungka mangkatai nasida taringot tu tarombo on, paboa na anggi ni Op Raja Ijae do Datu Pangganagana, alai didok uda Jansen: ”beha do bahenon ai nunga sanga Ketua iba”, ninna.
Naeng ma bukaonnami persoalan Tarombonta on ditingki Ketua dope Uda Jansen, alai ro Uda Adarusman par- Cimahi tubu ni Ompung nomor tolu na mandok tu hami, “unang pola apala di masa haketuaonna on buka hamu, asi roha, ai dung persiun udami ekonomina pe cepat anjlok , jolo periodema” ninna.
Gabe hutunda hami ma dohot abang Pungka mambuka persoalan i . Hape, sian na so huduga hami, periode berikutna ketua ni Op Raja Ijae dipasahat ma tu si Bernat L Tobing anak ni apala Amanguda Guru Justin L Tobing.
Beha do parmasuk ni angginiba si Bernat tu punguan ni Op Raja Ijae? Ai tingki di Hutabaginda Uda guru Justin natorasna maringanan, dang adong persoalan taringot tu tarombo on.
Sialana songon on do (cerita ni Abang Pungka L Tobing): Ia naeng mangoli si Bernat di Jakarta on , sanga do naeng pasahaton ni Uda Guru Justin tu pomparan ni Op Somuntul , alai muruk ma Uda Jansen, “molo i do pillitonmu , ula ma ulam” ninna , ala ibana nunga Ketua ni Op Raja Ijae. Jala pomparan ni ompung na solhot di Jakarta on hatiha i, i ma Uda Jansen do.
Ala gabe dipasahat do tu Uda Jansen laho mangamai, tontu masuk tu Op Raja Ijae do antong, ala sedang ketua ibana disi. Dung pangolion ni si Bernat do gabe mangihuthon Op Raja Ijae Uda Guru Justin /br Simorangkir (Janda Kaya ).
Di parmonding ni Uda Guru Justin natoras ni Ir Bernat L Tobing, ro do angka natua-tua sian Simanampang. Alai didok inanguda boru Simarangkir (Janda Kaya) do ia nasida masuk tu Op Raja Ijae.
Siala ni hata i, mulak ma sude par Simanampang tu huta, didok nasida: “molo songon i do, dang jagal nami i “ (lapatanna dang ulaon nami i. )
Gabe tallong ma rencana penguburan , ai Ompu na asing dang adong na barani manjama, ai tangkas do diboto angka natua-tua di Tarutung, ia guru Justin L Tobing apala amanguda ni Guru Pingkir L Tobing ( apala angkang niba, i ma na dohot mambahen pernyataan ni par Simanampang di Buku Tarombo na disusun ni si Adniel L Tobing)
Ujungna dijou ma muse par Simanampang dohot janji na so dohonon ni hasuhuton Pomparan ni Ompu Raja Ijae nasida. Tuat ma par Simanampang muse, jala ujung ni pangkataion i, mardalan ma parjambaran songon na niihuthon ni par Simanampang. Ai aut sura dang songon i, tinggalhonon ni par Simanampang do muse. Alai diadopi par Simanampang do ulaon i.
Secara kebetulan, baik si Halomoan, si Bernat maupun si Viktor apala anak ni Uda Gr Justin, dang adong na boi ro di parmonding ni Amanguda Guru Justin.
Jadi Amang nami St Gerhard , Uda St Marinus , dohot Abang Guru Pingkir do na gabe hasuhuton disi. Cerita nama na sahat tu angka anak ni Uda Guru Justin i, pardalan ni angka parjambaran sian Inanguda i.
Jala iba sandiri topet do marsingkola di PGSLP Tarutung tingki i, jala mananginagi do ahu di pintu ni jabu parrapoton i. Jala Amang Miduk L Tobing pe ninna disi do, lapatanna diihuthon Amang Miduk do parrapoton/pangkataion i. (Dang masitandaan dope iba di tingki i).
Jala siala i ma umbahen na mansai mendukung Amang Miduk di na tapajongjong Punguan ni Pomparan ni Datu Pangganagana anak ni Namorahian di Jakarta on, ai ro do amang Miduk di peresmian ni Punguan i, i ma Ari Minggu, tgl 29 Augustus 1982.
Di na masipatorangan Damang St Gerhard dohot dongan tubu na sian Op Lampas di parrapotan i, adong ma sian pomparan ni Op Lampas mandok tu Amang songon on: “mangihuthon pandok ni dongan tubunta di Jakarta si Jansen do goarna, ia Datu Pangganagana anak ni Op Raja Ijae do“ ninna, jala dialusi amang ma: “ai ise huroha si Jansen i, anggingku do i apala anak ni Amanguda , dang umbotoan i sian ahu, na so diantusi do i “ ninna Amang mangalusi . “Jadi molo songon i, sada do hita hape” ninna ma tu Amang, laos masijalangan ma nasida, i ma cerita ni Amanta hami tu ahu sandiri.
Asa jelas ma botoonta, ia dongan tubu pinompar ni Op Lampas, nunga tung leleng dang berkomunikasi be dohot par Simanampang di Silindung. Jala menurut pendapathu, mulai sian tahun 1887 tingki Wakil Kepala Negeri Op. Jarunjung, dang apala masijouan be diparadatan, lapatanna molo adong Adat, nunga cukup na di Simanampang mangulahonsa, molo tung ro pe sian Silindung , undangan na ma. Ai banje do ulaon adat di Simanampang, ala dua ompu disi i ma: Op Humorna dohot Op Pangajian. Molo di Op Humorna ulaon, ba Op Pangajian ma panamboli. Jala molo Op Pangajian marulaon, Op Humorna ma Panamboli. Molo asing sian i sada tingki na parpudi , ala ni pengaruh “devide et impera “ ni fihak na asing do.
Di parmonding ni Uda Jansen di Jakarta on, dipangkataion mulak sian udean, mullop ma hata sian Lae (mangulahi) Marpaung pensiunan Letkol mandok: Ai beha do huroha tarombonta, ai mulak ahu tu Medan Lae Darianus L Tobing par Binjai selaku Ketua ni Punguan Pomparan ni Datu Pangganagana di Medan, mandok “ Datu Pangganagana anggi ni Op Raja Ijae do, dang anakna”, ninna. Gabe songon na timbul do ketegangan tingki antara pinompar ni Op Lampas dohot iba, alai ala na baru berduka do saat i, gabe masiorom emosina be do, jala semufakat ma asa mangkatai taringot tu tarombo i di sada tingki. Jala laos dibuhul ma ari, di taon baru na ro hira 3 bulan nari , di bagas ni Bernat L Tobing. Jala namangkatai taringot tu tarombo i, holan pomparan ni Datu Pangganagana sambing do, dang dohot sian Op Raja Ijae.
Saut do pangkataion i di bagas ni si Bernat, alai ala adong angka na so konsisten tu rencana semula dipangkataion, gabe adong do ketegangan di tingki i. Alana, ia dung sidung ma marsipanganon, pintor didok natua-tua sian pomparan ni Op Lampas ma: “Jadi dang pola leleng-leleng, taolophon ma na pomparan ni Op Raja Ijae hita ate!” ninna. Pintor jongjong ma iba dohot abang Pungka, hudok ma: “Mangihuthon komitmen semula, na laho mangkatai taringot tu tarombonta do ala adong perbedaan, dang laho mangolophon. I pe, molo naeng torushononta mangkatai, jolo ditarik ma hatana” ningku, ai angka na torop pe nunga marungut-ungut di pangkataion ni natua-tua i. “Antong, hutarik ma hatangki, anggap ma i na so adong”, ninna ma, gabe boi ma dimulai mangkatai. Mansai godang do argumen disi, jala dang konsisten nasida, ai ternyata pomparan ni Op Raja Ijae i ma si Professor do pembicara nasida maralohon Abang Pungka dihot Iba sandiri.
Didok si Professor : “Ai Op Raja Ijae do na pajaehon Datu Pangganagana, i do patuduhon anak ni Op aja Ijae datu Pangganagana” , ninna. Hualusi ma, dang holan Op Raja Ijae mangalehon tano tu Datu Pangganagana, Op Parumarea pe adong do dilehon di Siualu Ompu, nunga hea huida i, ningku. (Ai hea didok abang guru Pingkir, jala dipatuduhon tu iba,dang apala tanggap iba disi, ai binoto dang pomparan ni Op Paruma rea Datu Pangganagana. Ai aut sura marroha-roha iba rupani, da boi ma gabe ahuton niba tano i? Alai dang tusi laona) Nuaeng pe, molo toho do hita naeng manaringoti kebenaranna, ingkon terbuka do hita menerima kesemufakatan, molo tung adong annon na marasing sian na binoanhonna, ingkon disediahon ma dirina” ningku.
Pintor ro ma pinompar ni Op Lampas i ma par Tomang ( na marboru Simorangkir, lupa iba goarna), mandok: “Manang na beha pe, sahat tu na mate, ianggo hami pinompar ni Op Raja Ijae do!” ninna. Ba molo songon i do dohononmu, ai so kumoras hamu sian natua-tua nami na di Simanampang “ ningku. (Jala huingot na nidok ni angka natuatuanta, jonok partubu alai jumonohan do parhundul, tar songon i do dongan tubunta pomparan ni Op Lampas na tading di Parbubu, ninna natua-tua di Simanampang)
Ujung ni pangkataion, diputushon ma asa borhat utusan tu Tarutung, laho managkasi. Sian pihak ni na mangihuthon par Simanampang dohot sian pihak ni na mangihuthon Op Raja Ijae alai pomparan ni Datu Pangganagana.
Borhat ma si Bernat Cs secara sepihak tu Tarutung , dang dipaboa tu hami. Dibahen ma parpunguan di Bagas ni si Bernat di Tarutung , jala dipillit nasida ma sian Simanampang na so apala mangantusi tarombo, asa mura pengaruhanna, laho manaringoti tarombo i.
Dang utusan ni natua-tua di Simanampang na dohot i. Jala binoto ma, na marsangajo do si Bernat dang paboahon tu hami asa borhat tu Tarutung. Dang jujur ibana tu hami. Di videohon ma pertemuan i, di edit ma video i, jala di issuhon ma naung setuju par Simanampang, ai nunga adong utusan ni par Simanampang. Hape angka na so mangantusi tarombo do dipillit nasida.
Hape, sian semula ingkon dohot do hami sian Jakarta, ima si Pungka L Tobing manang Almudin L Tobing , dohot Amangtua Maringan L.Tobing manang abangna Mangala L Tobing, rap dohot nasida laho manaringoti tarombo i tu bona pasogit. Ianggo semula hata asa patiurhon do, hape sesungguhna niat ni si Bernat Cs, asa mangihuthon na di rohana i do, apala i ma mambahen so tajalo rohaniba.
Ala dang toho na ro tu pertemuan i utusan ni par Simanampang, alai pribadi do, jala dang parbinoto natua-tua na di Simanampang taringot tusi, jadi gabe mengambil sikap ma Natua-tua na di Simanampang, ima : Unang lam mampar angka pinomparta i, tubu ma di roha nasida laho pajongjong tugu di Simanampang.
Tingki arisan di jabu ni si Mangasi L Tobing di Cijantung, tarboto ma ia Bernat Cs nunga “kampanye” di Jakarta on, dohot cara mamutar video naung di edit, pertemuan na di jabu nasida i di Tarutung, jala di issuhon ma, ia par Simanampang nunga satolop.
Ala kecurangan do pertemuan nasida i nietong, ro ma usul di tingki arisan na di bagas ni si Mangasi, di utus ma iba laho manangkasi natua-tuanta di Simanampang.
Borhat ma iba tu Simanampang, memang kebetulan naeng marpesta pamuli boru hami, gabe sada ni danggur dua na hona ma parlaoniba. Dibuat do sipanganon ni natua-tuanta di Simanampang, biayana i ma sian Punguan arisan Datu Pangganagana na di Jakarta jala dang pribadi iba na mambuat sipanganon i, laho mangkatai tarombo i, jala marpungu do sude angka natua-tua na tolap mardalan termasuk ma Kampung Gerson na marumur 87 taon tingki i (Pahompu ni Raja Wakil Op Jarunjung).
Di pangkataion i, dibahen ma tona nasida tu angka pinomparna, jala disuru ma iba manurat tarombo i, binahen ma i di atas kertas segel jala ditanda tangani angka natua-tua na di Simanampang ma. Dohot do natua-tua na so tolap ro tu parpunguan i martanda tangan disi. Jala hupaboa do diparrapotan i: “ia ngiet nami par Jakarta, asa ro hamu natua-tua nami songon utusan laho mangaresmihon punguan nami ima Punguan Pomparan ni Datu Pangganagana anak ni Namorahian di Jakarta”. Satolop ma nasida mangutus Ompung Demin L Tobing (Op Marni ) dohot Uda Aston L Tobing (ama Tambor).
Ro ma Ompung Demin L Tobing (Op Marni ) dohot Uda Aston L Tobing (ama Tambor) mangaresmihon punguan ni Datu Panggana-gana anak ni Namorahian di Jakarta, i ma tanggal 29 Augustus 1982 di Gedung Sekolahan GKPI Rawamangun, jala dohot do Raja Miduk L Tobing pomparan ni Op Somuntul tingki peresmian i.
Dapot ma di tingkina, saut ma dipajongjong par Simanampang tugu i, jala disurathon Tugu ni Datu Pangganagana anak ni Namorahian.
Gabe sibor ma si Bernat Cs, jala diperkarohon ma mar pengadilan. Dibahen ma Penggugat Bernat Cs, i ma kelompok na mangihuthon Op Raja Ijae, jala tergugat Nurdin Cs ima na mangihuthon Datu Pangganagana anak ni Namorahian manang par Simanampang.
Ia kelompok Bernat Cs di dampingi Pengacara do, alai kelompok ni Nurdin Cs dang didampingi Pengacara. Sudah tentu terjadi ketimpangan, ai holan keyakinan kebenaran do modal ni par Simanampang mangihuthon tona na jinalona, hape di zaman Orde Baru aha ma na so boi bahenon ni parhepeng? Dang pola maol antusanta i. Jadi, talu ma di Pengadilan Negeri par Simanampang, alai naik banding ma par Simanampang , jala mangido bantuan LBH ma hami tu UI di Jakarta, jala koordinasi dohot LBH ni USU di Medan, laho mangurupi par Simanampang , jala hasilna monang ma par Simanampang i ma Nurdin Cs, di Pengadilan Tinggi Medan.
Naik banding ma muse Bernat CS kasasi, jala di Jakarta nama proses ni i, jala monang ma Bernat Cs. Dung talu par Simanampang di Kasasi, hu upayahon hami ma muse Peninjauan Kembali, baru terbit dope undang-undang i, ala adong bukti otentik dapot hami i ma buku ni si Vergouyen tentang hukum Adat Batak dalam bahasa Inggeris, ai adong disi pas songon tarombo ni na di Simanampang i, na terbit tahun 1930 an. Tarsurat do disi na opat anak ni Namorahian i ma: Op Raja Ijae, Op Bonandolok, Op Parumarea dodot Datu Pangganagana (Simanampang). Sangat teliti do buku on, ai dang dapot disi na salah cetak nangpe manurathon hata Batak. Molo dibandingkon dohot cetakan di Indonesia ima terjemahan ni buku i Dr. Br Simatupang tu bahasa Indonesia , na godang sala cetak , isara ni Datu Pangganagana (Simanampang) di Buku Asli, gabe tarsurat Datu Pangganagana (Simaungmaung) di terjemahan.
Na nidok, ia ketelitian ni halak Bolanda laho mambuat gelar Doktor songon Vergouyen on, nunga marasing dohot Doktor ni Indonesia. Lapatanna, molo sedang persoalan do tingki i tarombo on, dang mungkin bahenon ni Calon Doktor ni Bolanda gabe contoh patorangkaon pardalan ni Adat Batak. Ai Tarombonta i ma di pangke si Vergouyen patorangkon sipatorangonna taringot tu parjambaran tingki Horja.
Mansai mura do alus ni Peninjauan Kembali i, di jaman Orde Baru, jala dang pola maol antusan i. Ai didok alasanna, pendapat pribadi ni si Vergouyen do ninna tarombo i. Beha ma mungkin pendapat ni si Vergouyen i, hape disurat do disi dijalo sian pomparan ni Op Tuan Nahoda( Par Sait ni Huta do i).
Iba sandiri yakin, aut sura di Jaman Belanda perkara on, paulahonna do i tu Raja Adat, ala dang wilayah ni Hukum Negara mengatasi persoalan i, alai wilayah Hukum Adat do, jadi ingkon paulahonna do persoalan i tu Raja Adat.
Godang do jebakan bahenon ni naung manimbil i, laho mambahen asa unang porsea tu Tona ni Ompunta i. Isarana na ro tu Iba songon on, didok Uda Jansen ma tu iba songon tudosan, songon on:
“Molo mapeut halto tu sada porlak, tubu ma gabe bagot, bagot ni ise do i?” ninna. Ala dolidoli dope ahu di tingki i, nian ianggo tarombo on dang tumangkas di ibana sian di ahu nang pe naung matua (Ketua) ibana. Dang apala huboto dope mangalusi secara pollung (diplomat), alai hualusi ma:” Dang toho umpama (tudosan) mi Amanguda bahenon tu ompunta”, ningku mangalusi. Gabe hohom ma ibana. Alai aut sura saonari taralusan do mandok, ia ompunta na mengandung Dt Pangganagana denggan do di alap sian Lobu Siregar. Jadi ndang songon halto na disirithon ni bontarpudi ompunta i. Ai ianggo madabu sian bonana do tu toru laos tubu di porlak i dang sisungkunon i. Alai ala na disirithon musang manang bontarpudi do umbahen sahat tu porlak i, dang binoto bonana sian dia, i do na sisungkunon. Hape Ompunta Datu Pangganagana jelas do bonana i ma Boru Siahaan sian Lobu Siregar na nialap (pardihuta) ni Namorahian. Dang adong sisungkunon disi. Ai dang adong sian kedua belah pihak ni na marparkarohonsa, so marhatutuhon ia Datu Pangganagana magodang di tabu-tabu do. (Tidak ada yang menyangkal bahwa Datu Pangganagana “magodang di tabu-tabu”)
Tinaringotan ma jolo muse dung ketua ni Op Raja Ijae si Bernat L Tobing di Jakarta, laos di lanjuthon do muse tu si Viktor L Tobing apala anggina . Jadi mulai periode ni Uda Jansen, diuduti periode ni si Bernat, diuduti muse periode ni si Viktor, jadi sian hita pomparan ni par Simanampang, na gabe Ketua ni Op Raja Ijae di Jakarta on, hurang lobi 36 taon. Molo Uda jansen mansai malo (berwibawa) di paradaton manang Raja Adat do, alai si Bernat andul dao ditoruna do i, songon i do nang si Victor. Boasa pola ingkon si Bernat dohot si Viktor gabe ketua ni Ompu Raja Ijae di Jakarta ?
Beha ma tutu bahenon ni naung manimbil i mulak tu hita? Sapala na maridi ba tonu ma ninna rohana ma. Gabe di devide et impera ma hita. Jala disundati ma Horja mamestahon tugu ni Datu Pangganagana anak ni Namorahian na di Simanampang i.
Ai dihallung Polisi dohot Tentara do tataganing, ogung dohot alat na asing, jala angka Natua-tua par Simanampang disarat-sarat ma tu Tarutung, dang dipardulihon angka tangis ni Natua-tua, ina-ina dohot dakdanak, jala na humansit di issuhon ma na PKI natua-tuanta i, asa adong alasan ni Polisi dohot Tentara terjun.
Polisi dohot Tentara manundati (menggagalkan) Horja naung tare parasoman, laho mampartahanhon Tona na jinalona sian angka Ompungna, jala na ni haporseaanna, di daerah pelosok huta Simanampang, salangkon di jaman penjajahan Bolanda pe, dang dung masa na songon on binoto. Hape dung mardeka hita di Republik Indonesia on, boi masa na songon i? Dang tarjalo roha i.
Pola do ro dongan tubu sian Silindung khususna Pomparan ni Bonandolok i ma sian Op Sumurung dohot sian Ompu Somuntul laho pasahat si pir ni tondi tu par Simanampang, pa pir tondi ni pomparan ni Datu Pangganagana anak ni Namorahian.
Dang kuat angka natua-tua bertindak (songon na kalah perang) mampartahanhon tugu na pinajongjongna i, ala bingung jala frustrasi nasida. Jala dibongkar ma tugu na pinajongjong ni natua-tuanta i. Sitarapan do ditogihon sian [enjara Tarutung laho mangarupakkon Tugu i, ai dang barani (dang pulut roha ni) Polisi, dung jolo disuntik dohot zat kimia.
Ia pajongjong tugu i, na gotong royong do angka natua-tua, naposo, dohot dakdanak, di hunti do rihit sian rura, dihali jala dihunnti do batu sian dolok Sitarindak, jala dihunti do simin sian Tarutung, dikocok nasida rihit dohot simin, jala tangan nasida pajongjongkon tugu i. Beha , boi do tabayangkon arga ni tugu i di nasida? Dang rupiah argana, alai moral, identitas, roha, tenaga, hodokna, dna. Beha do antong pangantusionta disi?
Jala sahat tu saonari effekna sangat negatif do tu pendididkan ni dakdanak, mentalitas ni angka natua-tua, ala bernit jala dangol situtu dihilala, dang boi mampartahanhon tona ni ompuna.
“Dipajongjong nasida tugu ni Datu Pangganagana anak ni Namorahian, da holan laho mampartahanhon tona ni ompuna do”.
Godang do na ro saonari di pesta on na menyaksikan cara ni aparat menggagalhon horja i. Frustrasi do angka natua-tua, naposo dohot dakdanak. Sian segi pendidikan tu dakdanak, godang do na sala tindakan ni dakdanak diloas natua-tua, misal na : Diloas do dakdanak mandangguri bagas ni Uda St Marinus (ala mangurupi Bernat Cs & polisi patudu dalan laho manggagalhon pesta i) jala dipandok dakdanak i: “Eh , Marinus, holan ala ni ho ma gabe sundat horja nami, huhut di dangguri jabuna”. Dipasombu angka natua-tua do angka dakdanak i. Disi ma antusanta, da naung frustrasi do natua-tua nang dakdanak?
Jala pengaruh na sahat do tu nuaeng on, mansai mura do nasida marsalisi, domu ma ala sai adong na mamola-mola manang mambahen de vide et impera. Sipata mura kompak, sipata mura marsalisi, tarida do i sian na masa tindakan nasida laho manegai jabu ni na diduga nasida parbegu ganjang (par Jae-jae didok nasida). Gabe di hurung polisi nasida di penjara Tarutung. Habisuhon ni angka ompunta najolo dang tarihuthon nasida nuaeng.
Dang na pasalahon nasida iba, alai sude i napatardashon tu hita do, ima: ia masa pe angka i naparpudi on, ala ni pengaruh ni proses devide et impera ni na memihak tu Op Raja Ijae do. Asi do roha di angka natua-tua i, ala dang gabe bantuan mamang pembinaan na ro sian pangarantona, alai angka bola-bola dohot ela-ela do asa unang tarihuthonsa tona ni ompuna.
Ia angka pangaranto ni halak, laho membangun hutana do, hape pangarantonta ??
Aha do naboi bahenonta?
Arga do bona ni pinasa di angka jolma na marroha.
Arga do tona ni ompunta, ai sipaihut-ihuton ni angka pinomparta.
Arga do tona ni ompunta, ai sipaihut-ihuton ni angka pinomparta.
Penutup:
Tubu ma dingin-dingin di porlak ni Janjimatogu
Horas ma tondi madingin, pir ma tondi matogu
Masiamin-aminan ma hita songon lampak ni gaol
Masitungkoltungkolan ma hita songon suhat di robean.
Horas ma tondi madingin, pir ma tondi matogu
Masiamin-aminan ma hita songon lampak ni gaol
Masitungkoltungkolan ma hita songon suhat di robean.
Nunga hupasahat tu hita Tona ni angka ompunta na di Simanampang, ala sangat dipercayahon nasida tu iba laho patolhashon Tona i tu hita pinompar ni Op Datu Pangganagana anak ni Namorahian. Mauliate ma di hamuna ala olo hamu tumangihon, jala tung mansai lumbang do huhilala nuaeng ala adong kesempatan na balga songon on, i ma Pesta Bona Taon on, laho patolhashon i tu hita saluhutna. Horas ma!
Jakarta, 31 Januari 2010
St. Drs Almudin L Tobing
0 komentar:
Posting Komentar